Uman nga magapatigayon it hub-eag protesta ag noise barrage ro grupong Piston makaron nga adlaw it Martes, April 7.
Raya hay agud nga iinsister ro panawaan para sa daeayon nga pagkakas sa excise tax sa mga produktong petrolyo agud magnaba eon ro presyuhan it langis sa local market.
Suno kay PISTON National President Mody Floranda, igapatigayon raya sa nagkaeain-eain nga mga terminal ag merkado kaibahan ro mga driver ag conductor it nagkaeain-eain nga public utility vehicle (PUV).
Gusto it grupo nga ipaabot sa administrasyong Marcos ro pagkalisod it tarnsport sector bangud sa uwa it untat nga bigtime oil price hike nga inde eon sarang mapunggan it gobyerno.
Igapanawagan it uman it grupo ro daeayon nga pagbasura sa Oil Deregulation Law nga nagiging rason nga inde eon makontrol it gobiyerno ro paghueag it presyo it mga produktong petrolyo.
Igadungan it transport group ro nasambit nga protesta sa bigtime oil price hike nga igapatuman makaron nga adlaw it Martes.
