KALIBO, Aklan — Patay ro sangka pitong-buean nga nabdos matapos nga magbigti sa sueod it gina-rentahan nga kwarto sa Sitio Bantud, Brgy. Manocmanoc sa isla it Boracay, Miyerkules it aga-aga.
Ginbawian it hueam nga kabuhi kato eagi ro biktimang si Jinky Tana, 23, naga-istar sa nasambit nga lugar.
Base sa report, masadya pang nagselebrar ko gabi-i it anang kaadlawan ro biktima antes raya nasapwan nga owa eon it kabuhi.
Sa panaysayon sa pulisya ni Sherwin Bantang, live-in partner it namatay nga naabutan nana nga nakabigti eon ro karelasyon gamit ro sangka eubid.
Ginhana pa sigon nana nga isalba ro kabuhi ni Jinky pinaagi sa pagpaeos kara sa pagkabigti ag dayun nga gindaea sa Don Ciriaco Tirol Memorial Hospital, apang gindeklarang dead on arrival bangud sa asphyxia ukon kawad-an it hangin sa baga.
Nakita man sa lugar ro sangka suicide note sigon it biktima.
Hasta sa makaron hay padayun nga nagapatigayon it imbestigasyon ro pulisya agud nga matumod kun may natabu nga foul play sa nasambit nga insidente.
