NATIONAL News — Kontra ro China sa planong pagbakae it Pilipinas it Typhon Mid-Range Capability missile system, sangka weaponry nga kan-o eamang hay ginbutang it Estados Unidos sa Manila.
Ginpahayag ni Chinese Foreign Ministry spokesperson Lin Jian nga ro nasambit nga tikang it nasyon hay makabig nga “provocative,” “dangerous,” ag “an extremely irresponsible choice” sa mga Filipino, Southeast Asian, history, ag regional security.
Sa pihak kara, ginpahayag ni Philippine Defense chief Gilberto Teodoro Jr., bukon pa it pinal ro planong pagbakae it Typhon Mid-Range Capability missile system.
Panindugan pa nana nga maskin nga nagakontra ro China sa plano, magapadayun gihapon ro Pilipinas.
Kan-o eamang hay ginhambae ni Armed Forces of the Philippines (AFP) chief General Romeo Brawner Jr. nga gusto nana nga magpabilin it mabuhay sa nasyon ro Typhon mid-range missile system it US.
