KALIBO, Aklan—Gin-abswelto it validating team maghalin sa Police Regional Office 6 ag Aklan Police Provincial Office si Malay PNP Chief PLTCOL Don Dicksie De Dios angot sa alegasyon it pagpangikil ag pag-abuso sa pilang mga negosyante sa isla it Boracay.
Suno kay PSSgt. Jane Vega, tagapaghambae it APPO nga nasabat eon ro nasambit nga isyu ag nakapadaea eon it report sa kampo krame si provincial director PCol Crisaleo Tolentino.
Ginpahayag dugang nga nag-imbestiga ro validating team sa mga indibidwal ag kompaniya nga namitlang sa nagkalhit nga anonymous complaint.
Makabig suno kana nga ‘poison letter’ ro sueat bangud nga napamatud-an nga owa it kamatuoran ro mga alegasyon kontra kay de Dios.
Nauna eon nga ginpamalibaran sa bombo radyo ni Lt. Col. de Dios ro akusasyon kun sa siin namitlang kara ro La Carmela de Boracay ag iba pang establisimento sa isla.
Suno kana nga puro pagpanamad eamang raya eabi pa ag hugut nanda nga ginapatuman ro health and safety protocols ag iba pang ordinansa sa isla.
