NATIONAL News — Aminado ro Philippine National Police Criminal Investigation and Detection Group (PNP-CIDG) nga nabudlayan sanda nga mag-usoy kay dating presidential spokesperson Harry Roque nga nagapangatubang sa contempt ag detention order halin sa House Quad Committee angot sa gina-alegar nga iligal nga mga aktibidad it Philippine offshore gaming operators (POGO).
Base sa report it mga kapulisan, kaeabanan nga nakakalikaw si Roque sa oras nga ginadakop imaw.
Apang, ginpahayag ni PNP-CIDG spokesperson Police Lieutenant Colonel Imelda Reyes nga may mabakod eon sanda nga mga impormasyon angot sa ginakahimtangan ni Roque.
Suno sa Bureau of Immigration, owa it hold departure order kontra kay Roque apang una ro anang pangaean sa immigration watchlist.
Sa pihak nga parte, ginpahayag ni Interior Secretary Jonvic Remulla nga si Roque eon bahala kon paalin nana nga paga-atubangon ro nasambit nga contempt ag detention order.
Sa makaron hay nagapabilin nga aktibo ro dating opisyal sa anang social media page kun sa siin nagapaguwa imaw it mga pahayag ag videos.
