NABAS, Aklan—Eubus ro kasakit nga nabatyagan makaron it pamilya it 13-anyos nga dalagita nga nasapwan eon lang nga nagahapa ag uwa it kabuhi sa katunggan nga bahin it Brgy. Unidos, Nabas ko Enero 17, 2025.
Raya hay matapos nga nagguwa sa inisyal nga resulta it autopsy nga ginpatigayon sa bangkay it biktima nga may nakit-an nga laceration sa kinatawo it daeaga, may consistent sexual abuse ag ro kinamatay kara hay ro lastro nga nakit-an sa anang ueo partikular sa may bandang waea nga dueonggan nga posibleng gin-eampusan it matig-a nga bagay hasta sa namatay.
Suno kay P/Maj. Jose Mark Gesulga, hepe it Nabas Municipal Police Station nga may tatlong person of interest sanda nga ginboe-an it mga statement ag sa oras nga makilaea ro suspek sa likod it krimen hay insigida nandang pagapasakaan it nagakaigong kaso.
Nagapadayon sigon ro andang back tracking sa mga cctv footage nga posibleng nahagip ro biktima bangud sa natabuan it krimen hay uwa it maeapit nga naka-install nga cctv camera ag madueom ro nasambit nga lugar.
Ginpahayag dugang ni P/Maj. Gesulga nga una pa eamang sa 30-40 porsyento ro andang imbestigasyon ag ginaconsolidate pa ro mga statement nga nabuoe sa pamilya, kaabyanan ag sa mga witness matapos nga uwa gihapon nakit-an ro cellphone nga daea it biktima antes natabo insidente.
Samtang, nagpanawagan ro pulisya sa mga pamatan-on nga maging responsable sa andang mga kaugalingon ag sa mga ginikanan hay usisaon ro mga ginaadtunan ag ro mga ginaobra it andang mga inonga.
Insigidang usuyon sanda engkaso nga inde makauli sa andang panimaeay.
Nagaapela man si P/Maj. Gesulga sa mga indibidwal nga may kasayuran ukon tul-id nga impormasyon sa insidente hay magdangop eamang sa andang taeatapan para sa kasolbaran it nasambit nga kaso.
