KALIBO, Aklan — Pagagamiton it Philippine National Police ro pribadong CCTV feed halin sa mga hotel, establisimyento, ag event venues sa Boracay paagto sa andang gintukod nga central monitoring system agud nga mas pang mapabaskog ro real-time monitoring samtang ginapatigayon ro ASEAN Senior Economic Officials Meeting Retreat 2026 sa isla.
Ginpahayag ni Police Regional Office (PRO-6) Regional Director PBGen. Josefino Ligan nga ro ginpaeapad nga CCTV network ro magasirbing nagapangunang mata it PNP sa kahabaon it baybayon it isla ag iba pang mga nagapangunang lugar.
Maskin nga owa pa sigon it natumod nga paeag, ginpahayag nana nga importante ro pag angkon it gintingub nga surveillance system agud nga mapabilin ro situational awareness ag madasig nga pagsabat sa anumang insidente.
Ginpabaskog man makaron ro mga checkpoint, pag-deploy it mas maabung kapulisan sa mga estratehikong lugar, ag nagapabilin nga naka-high alert ro mga intelligence unit matapos ro serye it mga bomb threat sa nagkaeain-eain nga parte it rehiyon.
Uman nga gin-insister ni Ligan nga maskin nga owa it kumpirmadong paeag, kinahangean sa gihapon ro mas mataas nga security posture agud nga masiguro ro maayos nga pagpatigayon it mga aktibidad it ASEAN.
Nasayuran nga ko Disyembre 4, nagpatigayon ro ASEAN Site Task Group “Boracay” sa idaeum it PRO-6 it full-scale tabletop exercises ag communication drills kaibahan ro national ag iba pang local partner agencies.
