Ginsalakay it Presidential Anti-Organized Crime Commission (PAOCC) kaibahan ro National Bureau of Investigasyon (NBI) ro sangka POGO hub sa Pasay City.
Makita raya sa kahabaan it Macapagal Avenue – pilang metro eamang ro eayo halin sa Senado nga matandaan nga pilang buean nga gina-imbestigahan ro issue it POGO.
Ro nasambit nga POGO Hub hay rehistrado sa paghimo it gaming operations apang nakabaton sigon it report ro mga otoridad nga angot raya sa love scam activities.
Nakita sa mga monitors sa nasambit nga POGO Hub ro pilang ebidensya nga nagahimo sanda it love scam/romance scam kun siin nagapadaea sanda it litrato it sangka babayi apisar nga eaki man ro katransaksyon.
Naga-abot sa 200 nga mga indibidwal ro nearesto it mga otoridad halin sa POGO Hub kun siin, mayorya hay mga foreign nationals.
