Ginaekspertar eon makaron it Population Commission ukon POPCOM nga magataas ro populasyon sa nasyon.
Suno kay POPCOM Aklan head Paul Adrian Pelayo, raya hay bangud sa mga ginpatuman nga community quarantine kon sa siin nakaangkon it bastanteng oras ro mga mag-asawa bangud sa temporaryong kawad-an it trabaho ag ro hugot nga mando nga pagpabilin sa sueod it baeay kon uwa it importante nga panaw agud nga malikawan ro pagkalhit it Coronavirus disease ukon Covid-19.
May kaangtanan kara, ro POPCOM hay nagmando sa mga rural health officer nga magpangbaeay-baeay agud nga ipaabot sa mga mag-asawa ro nagakaigong family planning kon uwa naila nga madugangan ro onga sa tunga it ginapangatubang nga krisis tuga it pandemya.
Apang, inde man sigon tanan hay maabot it mga RHU bangud sa masako man ro mga raya sa pagtatap ag sa pagmonitor sa presenteng sitwasyon tuga it pandemic.
Ginaengganyo sigon nanda ro mga mag-asawa nga ipairal ro pagiging madiskarte pag-abot sa pagplano sa pamilya kon sa siin ro importante sa makaron hay nakaangkon sanda it bastanteng oras sa andang bilog nga pamilya.
Nakit-an nanda ro hueag it andang mga onga, nakadungan sa pagkaon ag nakabonding maskin sa mapig-od eamang nga oras.
