Naeobong eon sa anang ulihing paeahuwayan ro lider it Simbahang Katolika nga si Santo Papa Francisco makaron nga Sabado, Abril 26.
Pribado ag simple ro ginpatigayon nga seremonya sa pag-eobong sa Santo Papa sa Saint Mary Major Basilica kaparehas sa anang naging hinyo.
Ro sangka grupo it mga marginalized people hay gin-imbitahan man nga pumila sa mga tikang sa anang ulihing paeahuwayan sa Basilica di Santa Maria Maggiore, sa pagtapos it funeral procession.
Sa anang final testament, ginhinyo ni Pope Francis nga maieobong imaw sa tunga it Chapel of the Salus Populi Romani ag Sforza Chapel, nga nakasueod sa Basilica of Saint Mary Major sa Roma imbes nga sa Grotto sa St. Peter’s Basilica.
Si Pope Francis ro kauna-unahang Santo Papa nga gin-eobong sa guwa it Vatican sa sueod it haeos sang siglo.
Ginbilin man it Santo Papa nga maging simple ro anang panchon nga uwa it partikular nga ornamentation ag mismong inscription eamang nga “Franciscus”.
Ro St. Mary Major hay espesyal sa namatay nga Santo Papa bangud sa anang debosyon kay Mary nga ina it Diyos.
Dikara sa masami nagapangamuyo si Pope Francis bago ag pagkatapos it anang mga biyahe sa ibang nasyon.
Samtang, nauna eon nga gin-anunsiyo it Vatican nga pwedeng bisitahon it publiko ro panchon ni Pope Francis halin sa Dominggo it agahon, Abril 27.
