Ginpirmahan ni Pangueong Ferdinand Marcos Jr., ro Republic Act No. 12325 nga naga-amyenda sa Universal Access to Quality Tertiary Education Act agud nga taw-an it prayoridad ro mga estudyanteng halin sa pinaka-pigado nga pamilya sa mga programang subsidiya it gobyerno.
Sa idaeum it bag-ong laye, unang pagataw-an it Tertiary Education Subsidy (TES) it Commission on Higher Education ro mga kwalipikadong estudyanteng kaibahan sa mga household nga benepisyaryo it Pantawid Pamilyang Pilipino Program o 4Ps.
Ro mga nabilin nga slot hay iga-identify base sa kita it pamilya. Nagguwa sa pagtuon it EDCOM 2 nga nagnaba ro parte it TES grants para sa pinaka-pigado nga pamilya halin sa 74.24% ko 2018 sa 30.74% ko 2022.
Gintukod man sa idaeum it nasambit nga laye ro Private Education Assistance (PEA) para mabuligan ro mga pigado nga estudyanteng nagabo-oe it mga kursong prayoridad it gobyerno apang bukon it sakop it iba pang scholarship ukon grant.
Maga-iba man ro haega it subsidiya depende sa degree program, samtang may dugang nga pondo para sa priority courses. Sakop man it subsidiya ro internship ag clinical training fees para sa nursing ag iba pang health-related programs.
