KALIBO, Aklan — Nag-umpisa eon nga magtaas ro presyo it mga bueak sa mga flower shops sa banwa it Kalibo sa bisperas it Valentine’s Day sa Pebrero 14.
Raya ro ginpahayag ni certain Vivien, sangka staff it flower shop.
Suno kana nga may mga dugang sanda nga delivery it fresh nga bueak makaron nga adlaw sa bisperas it okasyon, kun sa siin, mas pa nga nagsaka ro presyo bangud sa mataas nga demand.
Mataeupangdan suno kana ro pagtaas it presyo it mga bueak partikular ro roses nga madahog kada Valentine’s Day nga naga abot eon sa ₱100 hasta ₱120 ro kada sambilog.
Ro naka-arrange nga fresh flowers hay nagahampang ro presyo sa kapin sa ₱1,500.
Bangud nga kueabos eon sa oras ag fully booked eon sanda hay owa eon sanda nagabaton makaron it reservations, kundi nga nagapatuman it “first come, first served basis.”
Sa pihak nga parte, maabu man sigon ro andang naka display nga dried flowers bouquet nga naga-range ro presyo sa P350 hasta P2,500.
Apang ro mga nagapa-customized hay naga-abot ro presyo sa kapin sa ₱5,000.
Samtang, pila pa sa mga ginabaligya nga bueak hay ro mga sunflower, tulip, baby’s breath, carnation ag iba pa nga ro presyo hay nakadepende sa per piece ag kabahoe.
Ginpahayag dugang nga base sa andang eksperyensiya, ginaeauman nga mas pa nga magataas ro presyo sa mismong February 14 bangud sa pag dagsa it mga nagabakae nga kaabuan hay mga estudyante.
