KALIBO, Aklan—Kasunod it pilang ka mga paghugot sa idaeom it ginpaeawig nga MGCQ with heightened restrictions sa probinsiya it Aklan, nabatyagan man ro sangkiri nga pagnaba sa presyo it karne it baboy sa mga nagapangunang merkado publiko.
Suno kay Engr. Remelyn Ricoter, Regional Director it Department of Agriculture (DA)-6 nga makabig rayang manami nga balita eabi eon para sa mga konsumidor.
Suno kana, nakaangkon it pagnaba sa presyo it live weight rason nga nagnaba man ro presyo it karne sa mga tindahan.
Sa makaron nagahampang eon lang sa 120 hasta 135 pesos ro presyuhan sa buhi nga baboy halin sa dating 160 hasta 170 pesos.
Nagapati man si Ricoter nga naka-apekto ro paghugut sa pagnaba it presyo it karne bangud may pilang ka mga negosyo ro napilitan nga magsarado bangud sa kawad-an it kita partikular ro mga restaurants ag karinderya.
Sa pihak kara, padayun man nga ginabawaean it taeatapan ro pagsueod it mga frozen ag processed meat products halin sa guwa it rehiyon agud malikawan ro posibleng paeag it African Swine Fever (ASF) nga pumaki sa industriya it baboy sa mabahoe nga parte it nasyon.
