KALIBO, Aklan–Nagapabilin nga normal pa ro presyo it mga prutas samtang nagahilapit ro paskwa ag pagsug-aeaw it bag-ong dag-on.
Apang suno sa vendor nga si Jenelyn Obogan, posible nga magaeain ro presyo it mga nagkaeain-eain nga klase it prutas sa Disyembre 27 hasta it 31.
Masami eon suno kana nga nagataas ro presyo it mga prutas kaparehas it grapes, orange, mansanas ag iba pa bangud nga nagapataas man ro andang supplier.
Sa makaron suno kana hay may mabakae pang ubas nga 200 ro kada kilo, orange ag mansanas nga tig-napueo ag iba pang klaseng prutas sa barato nga presyo.
Nagabaligya man sigon sanda it tingi sa mga gustong magbakae it tig-sambilog eamang para makumpleto ro 13 ka klase it prutas nga igadisplay sa lamesa sa mismong pagsug-aeaw it bag-ong dag-on.
