KALIBO, Aklan–Dere-deretso eon ro pagnaba it presyo it kada kilo it sibuyas sa Kalibo public market.
Raya hay base sa price monitong it Bombo news team.
Suno kay Romy Agustino, sangka negosyante sa nasambit nga tindahan nga haeos P100 pesos ro ginbana it presyo kara kumpara ko Pebrero.
Madumduman nga nag abot sa 220 hasta 250 pesos ro baealigyaan it kada kilo it sibuyas ko nagtaliwan nga buean kumpara makaron nga nagahampang makaron sa P130 hasta 150 pesos.
Ginpahayag ni Agustino nga posibleng mabatyagan ro padayun nga pagnaba it presyo it produkto hasta sa buean it Hunyo.
Eubusan suno kana nga nagnaba ro presyo kara bangud sa sunod-sunod nga ani sa mga probinsiya eabi eon sa Mindoro ag Pangasinan.
Samtang, medyu nagbaliktad suno kana ro sitwasyon makaron bangud nga mas mahae ro presyo it imported onion nga naga abot sa 180 pesos ro kada kilo.
Sa pihak nga parte, dugang pa it negosyante nga eauman sigon nga uman eon man nga magataas ro presyo it sibuyas pagkatapos it harvest season ukon Hunyo hasta Disyembre kun sa siin kontrolado eon man it mga Chinese traders ro supply bangud nga sanda eamang sigon ro may nagakaigo nga cold storage facility.
Gindugang pa ni Agustino nga haeos tanan nga panakot ag tinuea makaron hay nagnaba eon kapareho it bawang nga una sa 85 pesos eon lang ro kilo; carrots nga nagabalor eon lang it 40 pesos per kilo , patatas 80 pesos ag ro repolyo hay 45 pesos per kilo eon lang makaron.
Raya hay tuga it manami nga tiempo sa baguio city ag owa it anuman nga kalamidad
