Ginkalampag it grupo it mangingisda ro Department of Agriculture (DA) nga magpatuman it price control sa mga isda kasunod it pagpanaeasa it bagyong Kristine ag Leon.
Base sa monitoring it Pambansang Lakas ng Kilusang Mamamalakaya ng Pilipinas (Pamalakaya) halin Oktubre 29 hasta 31 sa mga merkado sa Cavite, Rizal ag Quezon City, naobserbahan nga kapin sa P40 pesos ro gintaas it presyo it nasambit nga mga baligyang isda antes tumama ro bagyong Kristine sa nasyon nga nag-aywan it mabahoe nga kantidad it halit sa sektor it pagpanguma ag pangisdaan.
Sa pihak kara, ginpunto mat-a ni Pamalakaya Vice Chair Ronnel Arambulo nga bukon eamang it mga bagyo ro dapat basueon sa pagtaas it presyo it mga isda sa merkado kundi ro mga private traders nga nagapamentaha sa epekto it kalamidad para magmanipula ro mga presyo.
Bangud kara, gin-engganyo ni Arambulo ro Department of Agriculture nga dapat magpatuman it konkretong mga tikang para masiguro nga inde pagsamantalahon it mga trader ro pagpataas it presyo it mga isda sa pinaagi it price control ukon direktang pagbakae it mga isda halin sa mga mangingisda.
