Nakataeana nga igapaguwa it Department of the Interior and Local Government ukon DILG Region 6 ro sangka memorandum nga nagamandu sa mga local government units (LGUs) sa bilog nga Western Visayas nga uman nga buhion ro andang Local Price Coordinating Councils.
Tuyo kara nga mapabaskog ro pag-monitor sa suplay it gasolina ag presyo it mga baeak-eon kamana man nga malikawan ro hoarding ag bukon it rasonableng pagtaas it presyo.
Raya hay sa tunga it pagpahaum it mga awtoridad sa posibleng mas pa nga pagtaas it presyo it gasolina tuga it naga-grabeng tensiyong geopolitical sa Middle East.
Suno sa DILG Western Visayas nga ginatapos eon nanda ro nasambit nga memorandum nga magamandu sa mga LGU para sa uman nga pagbuhi it mga council agud nga mas nga mapabaskog ro monitoring sa suplay ag presyo it gasolina ag malikawan ro hoarding ag bukon it makatarungang pagtaas it presyo.
Ro nasambit nga tikang hay kasunod it interagency consultation ko Marso 9 kun sa siin gintalakay ro pagbantay sa presyo it gasolina ag ro coordinated nga sabat engkasong makaangkon it pagka-delay sa suplay bangud sa mga pangkalibutanon nga hitabu.
Importante sigon ro pag-activate it mga council agud nga masiguro nga haum ro mga LGUs sa pagsabat sa pabag-o-bag-o nga presyo sa merkado.
Sa pihak it naga-grabeng tensiyon, ginpahayag it mga awtoridad nga owa pa it nailistang pagka delay sa suplay it gasolina sa Western Visayas.
Gin engganyo man ro mga LGUs nga insigidang aksyunan ro mga iga-report nga pag-eabag agud nga maprotektahan ro mga bumaeakae ag magapabilin ro kapag-on it lokal nga merkado.
