KALIBO, Aklan—Nagapadayon ro price monitoring it Department of Trade and Industry (DTI) sa mga noche buena products kaangot sa nagahilapit nga selebrasyon it paskwa.
Suno kay DTI-Aklan provincial director Ma. Carmen Iturralde, 11 ka mga groceries stores, 3 nga supermarkets ag tatlong stores sa wet market ro andang ginsikyar makaron nga buean.
Ginpahayag nga kapin sa 92 ka mga produkto ro nagtaas it presyo, 134 ro nagapabilin sa normal samtang 6 ka mga produkto ro nagnaba ro presyuhanay kon ikumpara sa kaparehong period ko nagtaliwan nga dag-on.
Ro noche buena products kaparehas it hamon, keso de bola, pasta, creamer ag maabong iba pa hay uwa nagapareho ro presyo kon sa siin nakadepende raya sa brand it produkto.
Apang, ginpasiguro kara nga nagasunod sanda sa Suggested Retail Price (SRP) nga ginpaguwa it ahensya.
Samtang sa pihak nga parte, uman nga nagpadumdom sa publiko si Iturralde nga sikyaron it husto kon lehitimo ag bukon it peke ro mga christmas lights nga ginabakae.
Tan-awon it husto kon may Import Commodity Clearance (ICC) sticker ukon Philippine Standard (PS) mark ro mga christmas lights nga napilian antes nga bak-eon agud nga makasiguro nga makalikaw sa sunog para eon man sa kaeowasan it bilog nga pamilya.
