NATIONAL News — Ginkumpirma it Department of Justice (DOJ) nga may kabaylo nga ginahinyo ro Indonesia antes kara nga itau sa Pilipinas si dismissed Bamban, Tarlac Mayor Alice Guo ukon ro Chinese national nga si Guo Hua Ping.
Suno kay Justice Secretary Jesus Crispin Remulla, gina-request it Indonesian government nga ipadaea man kanda ro drug suspect nga si Gregor Johan Haas.
Mayo 15 kat naaresto it Bureau of Immigration (BI) si Haas sa Bogo, Cebu kasunod it Red Notice nga gin-isyu it International Criminal Police Organization (Interpol).
Ginakabig si Haas bilang sangka “high-profile fugitive” nga gina-alegar miyembro it Sinaloa cartel nga sangka international organized crime syndicate nga naka-base sa Culiacan, Sinaloa, Mexico ag involved sa drug trafficking ag money laundering activities.
Base sa Indonesian authorities, may kahilabtanan si Haas sa nagaplano nga mag-smuggle sa Indonesia ko Disyembre it shipment it floor ceramics nga may sueod nga masobra limang kilo it methamphetamine hydrochloride ukon shabu.
Ro pag-smuggle it illegal drugs sa Indonesia hay sangka krimen nga gina-sentensiyahan it kamatayon.
Sa pihak nga parte, nauna eon nga ginpahayag ni Remulla nga eain ro proseso sa pagpa-uli kay Alice Guo kumpara sa pagpadaea-pauli kanday Sheila Guo ag Cassandra Li Ong nga nadakpan sa Batam, Indonesia ko Agosto.
Nagapangatubang ro dismissed mayor it patong-patong nga mga kaso sa Pilipinas eakip ro human trafficking nga gina-angot sa gin-raid nga Philippine Offshore Gaming Operator (POGO) hub sa Bamban.
Mag-eowas kara, may ginpasaka man nga money laundering complaint, quo warranto petition, ag petition nga kanselahon ro anang birth certificate.
Magapadaea pa ro DOJ it team it andang senior prosecutors ag agents it National Bureau of Investigation sa Indonesia agud matan-aw ag maproseso ro pagpabalik kay Alice Guo sa Pilipinas.
