KALIBO, Aklan—Preparado eon ro Police Regional Office ukon PRO-6 sa June 16 soft re-opening it isla it Boracay matapos ro pilang buean nga pagpahuway it isla tuga it Covid-19 pandemic.
Sa sangka interview, ginpahayag ni PRO-6 Director Brig. Gen. Rene Pamuspusan nga haom eon ro bilog nga hubon it kapulisan sa pagsikyar sa isla sa ginaeauman nga pagbisita it mga lokal nga turista kadungan ro istriktong pag-implementar it health protocols ag guidelines nga gin-establisar it Boracay Inter-Agency Task Force ukon (BIATF).
Una kara, sa ginpatigayon nga assessment it BIATF nga ginpanguhan ni Environment Secretary Roy Cimatu, Interior and Local Government Secetary Eduardo Año ag Tourism Secretary Bernadette Romulo-Puyat sa ginpatigayon nga dry run it lokal nga gobyerno it Malay hay ginapasugtan eon ro mga lokal nga turista nga makasueod sa isla.
Apang, kinahang-ean nga taga-Western Visayas anay ro pwede nga makatabok sa isla nga ginakaeakipan it mga residente it Aklan, Antique, Capiz, Guimaras, Iloilo, ag Bacolod.
Mag-eowas kara, hugot nga igapatuman ro no booking, no entry policy agud nga malimitahan ro kapasidad it tourist arrival bangud nga 50 porsyente anay ro allowed makaron nga panyempo.
Nasayuran nga 98 beach guards ro naka-standby sa front beach kamana man 300 ka PNP personnel ro nakataeana sa bilog nga isla agud nga magsikyar it peace and order sa tunga it pakikipagsukoe sa pandemya.
