KALIBO, Aklan—Nakalista it 1.7 percent inflation rate para sa buean it Nobyembre ro Philippine Statistics Authority (PSA) sa probinsya it Aklan.
Raya hay mas mataas kon ikumpara sa national inflation rate nga nakalista eamang it 1.3 percent.
Suno kay Peter Mangilog, Statistician II it PSA-Aklan, maskin nga mataas it sangkiri ro inflation rate it probinsya kon ikumpara sa national hay makabig gihapon nga una sa lebel it gusto nga maabot it gobyerno nga inde magtaas sa 3 ukon 3.5 percent monthly.
Makabig suno kana nga maayos pa ro daeagan it presyuhanay it mga nagapangunang baeak-eon sa probinsya bangud nga manaba gihapon raya sa ginaeauman it mga economic managers.
Ro presyuhanay sa mga nagapangunang baeak-eon hay unpredictable rason nga inde gid mamintana ro ginahandom nga inflation rate maskin sa national bangud nga nagasunod raya sa demand ag supply.
Ginpaathag dugang ni Mangilog nga may pagtaas it presyo it isda ag karne apang nagapabilin nga bastante ro supply.
Ro pagsikad it inflation hay bangud pa sigon sa mas mataas nga presyo it sigarilyo, aeak, housing ag utility costs.
Samtang, posibleng magtaas pa ro inflation rate makaron nga buean it Disyembre bangud nga maabo ro mga nagapamakae it nagkaeain-eain nga produkto bangud sa Kapaskwahan.
