Kalibo Aklan —–Uman nga nadugangan ro kaso it mga nagpositibo sa COVID-19 sa probinsya it Aklan.
Raya hay sa katawuhan it sangka 59-anyos nga repatriated Overseas Filipino Workers nga taga banwa it Makato nga nag-abot sa probinsya ko Mayo 20 it presenteng dag-on.
Sa ginpaguwa nga official statement it Provincial Health Office (PHO-Aklan) , ro nasambit nga OFW kaibahan ro tatlong iba pa sa batch 3 hay ginboe-an it swab sample ko Mayo 22 ag ginpadaea sa Western Visayas Medical Center, sub-national laboratory ko Mayo 23 kon sa siin kahapon eamang nagguwa ro andang confirmatory result nga positibo imaw sa virus nga Sars-CoV-2 nga nagadaea it sakit nga COVID-19.
Ginpabutyag nga ro nasambit nga seafarers hay naghalin sa Germany ko March 18 ag nag-abot sa Cebu via Dubai ko March 19 kon sa siin sanda na-stranded.
Ro COVID-19 patient hay asymptomatic halin kat nag-abot raya sa probinsya hasta sa makaron apang ginpakamayad nga gintransfer sa Aklan Provincial Hospital halin sa sangka hotel quarantine facility para sa close observation ag monitoring.
Nasayuran nga raya eon ro pang waeong kaso it Covid-19 sa Aklan kon sa siin ro pito hay ginakabig eon nga fully recovered halin sa sakit matapos ro pagbueong ag quarantine procedure.
