BANGA, Aklan—Ginpamalibaran it 1st Boracay Master Diver’s Association Inc. nga may kweba sigon sa lugar it Aklan river nga ginapahayag dikato naeomos si Jhuros Flores ko Enero 29, 2025.
Raya ro ginklaro ni Louie Aron, supervisor it nasambit nga asosasyon nga sambilog sanda sa mga boluntaryong nagtinguha nga maeonip ro suba agud nga makit-an kunta ro eawas it 15-anyos nga binatilyo.
Gin-insister kara nga medyo may kadaeomon gidman ro nasambit nga parte it suba kon sa siin ginapahayag nga ginhunos it lilo ro estudyante apang ukab eamang sigon ro andang nataeopangdan sa andang pag-eonip ag bukon it kweba.
Ginklaro dugang ni Aron nga maabong mga structures sa area ag bukon it stable ro baeas rason nga mabahoe ro posibilidad nga natambakan raya ukon nasang-it.
May posibilidad man suno kana nga naanod ro eawas it binatilyo bangud sa mabaskog nga sueog it tubi.
Nasayuran nga haeos tanan nga nagboluntaryong mag-eonip sa suba agud nga makit-an ro eawas ni Jhuros hay mga bihasa apang napas-eawan sanda sa masobra sang dominggo nga search, rescue and retrieval operation.
Samtang sa pihak nga parte, padayon nga nagaeaum ro mga ginikanan ag himata ni Jhuros nga uman imaw nga makit-an maskin ro anang eawas eon lang sa haeos tatlong dominggo eon kara nga pagkaduea matapos nga maeomos sa suba nga sakop it Brgy. Polo sa banwa it Banga.
