KALIBO, Aklan — Hasta sa makaron hay owa pa it ginsumiteng proposisyon sa mga lokal nga opisyal para sa ginaduso nga pagpatindog it tulay nga magakonekta sa sikat nga Boracay sa mainland Malay.
Nauna eon nga nagpaguwa ro Sangguniang Bayan it Malay it Resolution No. 184, Series of 2024, nga nakabaehag nga owa pa sanda nakabaton it anumang pormal nga proposal ukon request para sa tulay.
Pilang mga residente, mga boat operators , mga tag-ana it cargo boat , ag iba pa hay nagpangayo makaron it eksplinasyon sa mga lokal nga opisyal matapos mapabalita ko Agosto nga ro pagpatindog it tulay hay gintaeanaan eon it pondo sa masunod nga dag-on.
Ro ginaproponer nga tulay hay naeakip sa P4.6-bilyong pondo para sa public-private partnerships it Department of Public Works and Highways.
Nakabutang man sa PPP Center sa andang website ro proyekto nga igapatindog it San Miguel Holdings Corp.
Ro tulay nga may haba nga 1.2-kilometro hay magakonekta sa Boracay ag mainland Malay.
Suno sa PPP Center, tuyo it proyekto nga magtau it all-weather, safe, ag efficient access paagto ag paguwa it Boracay kadungan ro pagsuporta sa dere-deretso nga pag-umwad it lugar.
Nagpanindugan ro local government unit LGU Malay ag Sangguniang Bayan nga samtang indi mabaton ag matun-an ro proposal hay indi pagapasugtan ukon paga aprubahan ro construction project.
Sa makaron ro pag agto ag pagguwa sa isla it mga turista ag mga residente hay nagakinahangean nga magsakay it baroto.
