Kalibo Aklan———-Ginbasura ni Malay Mayor Frolibar Bautista ro proposisyon it Sangguniang Bayan nga hugtan ro travel restrictions sa nasambit nga banwa.
Madumduman nga nakabaehag sa SB Resolution No. 149 nga may petsang September 10 nga temporaryong ipasarado ro andang border sa parte it Nabas ag Buruanga matapos nga makalista it kauna-unahan nga local transmission sa probinsiya it Aklan nga ginaeakipan it sangka staff it Aklan Provincial Hospital.
Suno kay Mayor Bautista nga matapos ro andang pueong it Lokal Inter-Agency Task Force against COVID 19, nagpaguwa imaw it Executive No. 46 ko September 12 agud nga i-veto ro nasambit nga rekomendasyon it mga konsehal .
Kadungan kara, nag apela imaw sa mga residente nga hugut nga ipatuman ro minimum health protocols it Department of Health agud nga matapa ro pagkalhit it coronavirus disease ukon COVID 19.
Ginklaru man nana nga ro nag positibo sa sakit hay owa man nakatabok sa Isla kundi sa mainland Malay eamang .
Gindugang pa kara nga ro ginaduso nga border closure hay mas pang makahalit sa bagsak eon nga negosyo sa Boracay ag Malay nga naapektuhan it krisis tuga it pandemya .
Sa makaron hay sigidas sigon ro andang preparasyon kabulig ro Provincial Government ag mga negosyante sa pagbukas it Boracay sa oktubre 1 pinaagi sa travel bubble strategy , kun sa siin, bukon eamnag it domestic tourists ro ginabaton kundi maskin ro mga dumueuong nga tutista nga may manaba ukon owa eon it nailistang kaso it COVID-19 .
