Kalibo Aklan—–Aprubado eon sa pangatlo ag ulihing pagbasa ro House Bill 624 ukon ro proposisyong nagaduso ipangaean kay dating Congressman Allen Salas Quimpo ro Kalibo-Banga-Balete-Batan-Altavas highway.
Rayang proposisyon hay gindihon ni Aklan 1st District Rep. Carlito Marquez kon sa siin katuyuan kara nga mataw-an it importansya ro hinimuan it ginakabig nga sambilog sa mga highly esteemed politicians sa probinsya it Aklan.
Ro nasambitang highway hay kaparte it 47.587 kilometers nga a-eagyan paadto it probinsya it Capiz ag syudad it Iloilo.
Nasayuran nga si Atty. Quimpo hay naging three-term congressman it Lone District of Aklan halin 1992 hasta it 2001.
Ginakabig man imaw nga ama it Department of Education (DepEd) bangud sa pag sponsor kara agud maseparar ro basic education ag higher education.
Mag-eowas kara, imaw man ro ama it Aklan State University (ASU) bangud sa pag sponsor it laye agud raya hay maging unibersidad.
Si Atty. Quimpo hay namatay ko Disyembre 14, 2016 bangud sa stage 4 pancreatic cancer.
