Uwa it nagpamaeabag sa ikatlo ag pinal nga pagbasa it House Bill 10985 sa Manabang Kapueungan it Kongreso nga nagatuyong magtao it trabaho para sa mga indibidwal nga may edad 60 pataas.
Ro hagna nga ginatawag nga Employment Opportunities for Senior Citizens and Private Entities’ Incentives hay nagamando sa Department of Labor and Employment (DOLE) nga magpatuman it mga programa agud magkriar it trabaho para sa mga senior citizen.
Kaibahan sa laye ro pagmando sa tanan nga ahensya it gobyerno ag mga pribadong kumpanya nga magkriar it employment program nga magaduso sa kamayad it mga magueang.
Tuyo it programa nga siguraduhon nga may patas nga oportunidad sa trabaho para sa mga senior citizen nga may ikasarang, kwalipikasyon, ag interes nga magtrabaho.
Ro nasambit nga hagna hay sangka tikang para masiguro nga magapabilin nga produktibo ro mga senior citizen ag makaangkon sanda it kahigayunan nga mapamayad ro andang pangabuhian.
