KALIBO, Aklan—Nakabaton it cash assistance ro mga residente nga naapektuhan it rouge wave ukon mga mabahoe nga humbak kun sa siin ro andang mga baeay hay nagkaeasamad tuga it pagsueod it amihan.
Kabilugan nga 11 nga pamilya halin sa Baragay Caano, Kalibo ro nakabaton it financial assistance pinaagi sa Provincial Social Welfare and Development Office Aklan.
Pito sa mga raya nga nakaangkon it totally damaged nga baeay ro gintaw-an it tig-10,000 pesos samtang ap-at nga iba pa ro tig-5,000 pesos nga partially damaged ro baeay.
Personal nga ginpangunahan ni Gov. Joen Miraflores ro pagpanupod it ayuda.
Samtang, ginpahayag ni Roselyn Rentillo , sambilog sa nakabaton it 10,000 pesos nga cash assistance nga ro kwartang andang nabaton hay ginbakae it trapal nga pangtabon sa andang atop ag iba pang gamit matapos nga ma-wash-out ro andang mga kagamitan.
Sa makaron hay temporaryo sanda nga naga-istar sa andang kakilaea .
Apela nana nga mataw-an sanda it housing unit agud nga makahalin eon sa nasambit nga lugar nga masyado eon suno kana nga delikado bangud nga maeapit eon sa bibi it baybay.
Ro iba sigon kanda hay naeakip san aka avail it pabaeay apang owa pa na-award.
Samtang, handum man ni Rose Grutas nga makasaylo eon sanda sa gintaeana kanda nga housing unit sa Brgy. Nalook .
Aminado imaw nga peligroso eon nga mag-istar sa nasambit nga lugar bangud sa climate change.
