KALIBO, Aklan—Unanimous ro naging desisyon it mga miyembro it Provincial Inter Agency Task Force on COVID-19 nga paeawigon pa it daywang dominggo ro enhance community quarantine sa bilog nga probinsya it Aklan.
Raya ro ginkumpirma sa Bombo Radyo ni Aklan Governor Florencio Miraflores.
Suno kana, uwa pa nakasiguro nga eowas ro probinsya sa 2019 coronavirus disease ukon COVID-19 rason nga ginpakamayad nanda nga paeawigon pa ro ECQ para sa kaeowasan it tanan.
Uwa pa sigon nakasayod kon anu ro minatuod nga estado it probinsya bangud nga may mga person’s under investigation ukon PUI’s pa nga ginahueat ro andang confirmatory result.
Ginpaathag pa ni Gov. Miraflores nga sigidas pa ro pag contact tracing sa mga indibidwal nga nakasalamuha it mga nagpositibo sa COVID-19.
Nagsakripisyo eon suno kana ro tanan ag uwa sanda naila nga mauli raya tanan sa uwa rason nga ginpakamayad nga paeawigon ro ECQ.
Ginapanan-aw sigon it task force nga kon tapuson eagi ro ECQ sa Abril 14 hay posible nga magabalik ro tanan sa dating gawi ag maga-normal ro paghueag it mga tawo apang ro kontra hay virus ag inde raya makit-an it maskin sin-o.
Ginhinyo man kara ro kooperasyon ag pag-intindi it mga pumueoyo para sa kaeowasan it tanan.
Nasayuran nga ro Aklan hay may an-om eon nga kaso it COVID-19 ag 36 pa ka mga specimen sample ro pending makaron sa Western Visayas Medical Center sa syudad it Iloilo.
