KALIBO, Aklan — Nag-apela ro Provincial Social Welfare and Development Office (PSWDO) sa mga pumueuyu nga kon mahimo hay indi pagtaw-an it kwarta ro mga nagapakalimos nga mga Badjao sa banwa it Kalibo .
Raya ro ginpahayag ni PSWDO head Evangeline Gallega matapos nga uman nga nataeupangdan ro pag-inabu it mga Badjao nga nagapangayo-ngayo nga kon sa siin kaabuan sa mga raya hay mga inunga nga may ginabitbit pa nga mga eapsag .
Suno kay Gallega nga gin-rescue ag ginpabalik eon nanda sa andang lugar ro mga Badjao ko nagtaliwan nga mga dinag-on, apang uman sigon nga nagbalik ro mga raya sa Aklan partikular sa banwa it Kalibo bangud sa pagiging maalwan it mga Aklanon nga nagatau kanda it limos ag owa nagapanakit kanda.
Aminado man ro opisyal nga mabahoe nga hangkat kanda nga mahimos ro mga Badjao bangud nga mabudlay ro mga raya nga mapabalik sa andang lugar .
Samtang, ginhinyu ni Gallega ro bulig it publiko nga makipag-angot sa andang taeatapan ro sin-o man nga may manami nga suhestiyon agud nga mahimos ro mga raya sa banwa it Kalibo .
Ginpahayag dugang nga mabudlay man nga mausuyan it trabaho ro mga Badjao bangud sa kawad-an it skills kapareho it pagiging construction worker ag iba pang trabaho maskin nga mabahoe ro andang mga eawas .
Kabay suno kana nga mataw-an it atensyon ro mga Badjao ag iba pang mga indigenous people nga halin sa ibang mga probinsiya nga nakipagsapalaran eamang sa Aklan agud nga indi eon magwinarang ag magpakalimos sa banwa it Kalibo .
Ginpadumdum man nana ro publiko nga ro pagtau it kwarta sa mga Badjao hay sangka pag-eabag sa naga-eksister nga laye angot sa Anti-Mendicancy Law .
