KALIBO, Aklan—Gin-engganyo ni Atty. Harry Sucgang, sangka political analyst ag dating sangguniang panlalawigan member ro publiko nga magpanindugan agud nga matapna ro korapsyon sa nasyon.
Suno kana nga kon may mataeupangdan nga nagakatabu nga anomaliya dapat nga ipahayag raya sa natungdan nga opisyal ukon ahensiya it gobyerno kaibahan ro mga nagakaigo nga ebidensiya.
Apang ro problema sigon sa mga Pinoy hay owa sanda it kabaskog it buot nga magguwa ag isugid ro mga korap nga opisyal.
Mabahoe ro anang pagpati nga engkaso nga maduea ro korapsyon hay may tsansa ro Pilipinas nga maga-asensyo.
Apang ro masubo hay matsa nakasanayan eon sigon ro mga makarondaya nga kalakaran sa nasyon kun sa siin maskin may nagakaigo nga ebidensiya ag mataw-an it suhoe ukon lagay hay naabswelto sa kasong ginapangatubang .
Samtang, gintumod nana nga bangud sa kahinaan it law enforcement agency ag judicial system rason nga nagapangibabaw ro korapsyon.
Raya hay kasunod sa ginaduso ni Senator Raffy Tulfo nga maimbestigahan ro gina-alegar nga korapsyon sa National Irrigation Administration (NIA).
Suno sa senador nga umpisa 2017 hasta 2022 hay naga abot sa P121 billion ro pondo it NIA para sa irrigation development ag restoration.
Apang sa nagtaliwan nga limang dag-on kaabuan sa mga proyekto it NIA hay owa natapos, substandard ro mga gamit nga materyales, ag may una pang mga anomalya kun sa siin kaabuan sa mga ‘ghost projects’ hay makita sa Mindanao.
