KALIBO, Aklan — Naaresto eon it mga pulis ro pugante nga may kasong robbery with rape sa ginkasa nga manhunt operation sa Brgy. Agcawilan, Lezo, adlaw it Huwebes, Enero 1, 2026.
Suno kay P/Capt. Donie Magbanua, OIC chief of police Lezo Municipal Police Station nga haeos ap-at nga oras ro andang pag-eagas sa suspek nga nakilaea kay alyas Eric antes nanda nga na-corner bandang alas-5:00 eon it agahon.
Natumod it mga operatiba ro anang ginakahimtangan matapos nga makabaton it tawag halin sa 911 pinaagi sa Aklan Police Provincial Office sa naka-eskapo nga preso sa Integrated Rehabilitation and Security Unit ukon dating Aklan Rehabilitation Center .
Dugang pa nga nag-report man ro anang mga igmanghud nga nag-uli raya sa andang baeay sakay ro sangka motorsiklo.
Natukiban ro pag eskapo it suspek bandang alas-12:30 it aga-aga matapos nga magpatigayon it head count ro mga naka-duty nga jail guard.
Sa pihak nga parte, posibleng magapangatubang sa dugang nga kasong robbery hold-up ro suspek matapos nga gina alegar nga ginsaka kara ro sangka baeay sa nasambit nga lugar bandang alas-2:00 it aga-aga ag gintakaw ro kwarta ag cellphone.
Dugang pa nga kat ginhimo ro krimen hay armado raya it screw driver ag ginhana nga bun-on ro sambilog sa mga unga it tag-ana it baeay.
Ginhana pa kara nga sudlon ro kaiping nga baeay apang insigida man nga nagpaeagiw.
Si alyas Eric hay haeos an-um nga buean eon nga nakakulong sa ARC.
Ro operasyon hay pinaagi sa tingob nga pwersa it Lezo ag Kalibo MPS, mga tawuhan it ARC ag Provincial Intelligence Unit.
Owa eon man sigon nagsukoe ro suspek sa posibilidad nga gin-gaoy man raya it dinaeagan.
Matapos nga maaresto, gindaea ro preso sa police station para sa nagakaigo nga dokumentasyon ag pagpasaka it dugang nga mga kaso kontra kana.
P/Capt Donie Magbanua, OIC chief of police Lezo Municipal Police Station
Sa pihak nga parte, ginpahayag ni alyas Eric nga bandang alas-11 it gabi-i it Disyembre 31 hay nakakita imaw it kahigayunan nga makatak-eas sa pader hasta nga madinaeag-on nga naka-eskapo.
Sangka motorsiklo sigon ro anang nakita ag ginsakyan pauli sa andang baeay sa Lezo.
Suspek nga si alyas Eric
