BALITA Espesyal — Nakibot ro mga doktor sa sangka ospital sa Singapore kat makita nanda nga may nakabarang pugita (octopus) sa tutunlan it andang pasyente!
Nakabatyag it pagsuka ro owa eon ginpangaeanan nga pasyente matapos imaw nga magkaon sa sangka restaurant it hilaw nga pugita.
Kat indi eon nana masarangan nga tunlon, gindaea nana ro anang kaugalingon sa emergency room it Tan Tock Seng Hospital.
Insigida imaw nga ginpa CT scan it mga doktor ag may nakitang nakabara sa anang tutunlan.
Agud nga makasigurado, ginpaidaeum imaw sa procedure nga “esophago gastro duodenoscopy”.
Ro nasambit nga invasive procedure hay ro pagsueod it manipis nga tubo nga may camera sa tutunlan.
Pinaagi kara, nakita nga may sangka bilog nga pugita nga nakabaeabag sa esophagus it pasyente.
Inabot it pilang oras antes nga nabo-oe ro pugita sa tutunlan bangud nga maselan ro procedure agud nga raya hay mabo-oe.
Dahan-dahan ro pagbo-oe kara agud nga indi masamad ukon makaangkon it rupture ro esophagus it pasyente.
Bukon it klaru kon ham-an nga gintueon it pasyente it bilog ro octopus.
Sa mayad nga swerte, naging madinaeag-on ro gastrointestinal procedure ag na-discharge imaw sa ospital matapos ro daywang adlaw.
