KALIBO, AKLAN — Owa it makatupong sa kasadya nga ginabatyag sa makaron ni PO3 Che Mayo Guevarra it Brgy. Estancia, Kalibo matapos nga mapabahin sa mga nakapasa sa BAR examination.
Suno kay Atty. Guevarra nga “overwhelming” ro bag-ong natabo sa anang kabuhi nga gina kabig nga sangka timpranong regalo maghalin sa Ginoo para sa anang ika-39 anyos nga kaadlawan sa maabot nga Mayo 29.
Makabig nga hueas ag dugo man ro anang naging kapital agud maabot ro anang gina handum sa kabuhi nga maging abogado.
Manami sigon batyagon nga ro kadaeag-an hay gin ani maghalin sa kalisdanan nga gin agihan.
Nasayuran nga waeong dag-un sigon ro anang gin hueat antes nga maangkon ro katam-is it kadaeag-an.
Nag umpisa sigon imaw nga mag enroll sa College of Law sa Polytechnic University of the Philippines sa Metro Manila ku dag-un 2009 kun sa siin hasta it tatlong dag-un idtu antes nga nagsaylu it eskwelahan sa Philippine Law School.
Nag abot man sigon it an-um nga dag-un ro pagtuon ni Atty. Guevarra it law bangud sa anang profession bilang sangka pulis.
Aminado imaw nga pagtiis, pagtiyaga ag determinasyun ro makabig nga mga armas agud maabot ro pinakahandum sa kabuhi.
Makabig pa sigon nga abnormal ro lifestyle sa tiempo it law schools bangud kinahangean nga mag-focus ag isakripisyo anay ro ibang mga bagay.
Nasayuran nga maghalin sa pagiging police officer III, magiging senior police inspector eon ro rangko ni Atty. Guevarra.
