KALIBO, Aklan — Nag-sumite it anang resignation ro Punong Barangay it Capataga, Malinao bangud sa owa natuman nga promisa sa anang mga nasakupan.
Suno kay dating Punong Barangay Romy Agustino nga ko tiempo it eleksyon hay ginpromisa nana sa anang mga kasimaryo nga pagabutangan it sementadong karsada ro andang barangay.
Apang, bangud sa patakaran ukon rules it Commission on Audit ukon COA nga indi pwedeng sakupon it andang budget ro karsada it kaiping nga barangay it Sugnod nga may connecting road hay imposible raya nga mahimo.
Base sigon sa mapa, maagyan it proyekto ro daywang kilometrong karsada it Barangay Sugnod .
Handum nana nga mataw-an gihapon it katumanan ro anang plano engkaso nga ipursige it national government nga maagyan it national highway ro andang karsada paeapos sa probinsiya it Antique.
Samtang, nagaeuam si Agustino nga mapadayun it magabueos kana sa pwesto nga si Punong Barangay Aileen Rubio ro anang mga naumpisahan nga proyekto .
Sa sueod sigon it waeong buean nana sa pwesto hay nakaangkon it development ro andang barangay ag improvement sa pagpangabuhi it mga pumueuyu eakip ro pagbutang it solar lights sa mga baeay nga owa it supply it kuryente nga ginpromisa kana it sangka pribadong sektor.
Plano ni Agustino pagkatapos it anang resignasyon nga uman nga mag-focus sa anang pagiging negosyante.
Ginsumite sigon nana ro anang resignation kay Malinao Mayor Josephine Equina.
