KALIBO, Aklan–Hugut nga ginapamaeabagan it grupong Bayan-Panay ro pag-phase out it gobyerno sa mga traditional jeepney sa bilog nga nasyon bilang kaparte it Public Utility Vehicle (PUV) Modernization Program.
Raya hay matapos nga gintaw-an it Land Transportation Franchising and Regulatory Board (LTFRB) ro mga driver ag operator it hasta Disyembre 31 nga deadline para magpasakop sa sangka kooperatiba ukon korporasyon.
Suno kay Elmer Forro it Bayan-Panay, makabig nga sangka negosyo ag owa it pag-ulikid sa mga ordinaryong driver ag operator ro PUV modernization program it gobyerno.
Ro pagtukod sigon it kooperatiba hay medyo alibi eamang it LTFRB agud nga maging monopolyo ukon mapanag-iyahan it mabahoe nga korporasyon ro industriya it transportasyon sa nasyon.
Dugang pa kara nga indi masarangan it mga maisot nga operator ro pag-angkon it modernized jeepney nga ro sangka unit hay naga-balor it P2.4 million hasta P3 million.
Kun sa siin, raya hay andang pagabayaran sa sueod it pitong dag-on.
