Kalibo Aklan——–Agud nga makabulig sa isigkatawo ro pinaka-rason it asosasyon it Persons With Disabilities (PWDs) sa banwa it Numancia rason nga nagbuylog sa ginpatigayon nga mass blood donation it lokal nga gobyerno it Numancia ag Aklan blood bank sa pakikipagbueuligan it Bombo Radyo Kalibo.
Ro event hay ginpatigayon sa numancia sports and cultural center kaina it agahon nga pormal nga nag-umpisa bandang alas-7:30 it agahon hasta alas-12 it udtro adlaw .
Suno kay Mark Janis Salvilla, Presidente it PWD Association Numancia Chapter nga sa pihak it andang mga kapansanan sa eawas, nakikita it mga kaibahan nga blood donors ro pagkinahangean it andang mga kasimanwa rason nga naghueag agud nga makabulig sa pamaagi nga andang nasayuran .
Nagaeaum imaw nga ro andang tikang hay pagatuearon man it ibang banwa .
Raya sigon ro kauna-unahan nga kahigayunan sa aklan nga ro asosasyon it PWDs hay nakibuylog sa blood letting campaign .
Samtang, nag-abot sa bags it dugo ro andang natipon nga andang iga-turn over sa aklan blood bank.
Kabay suno kana nga makabulig raya it mabahoe agud nga makaangkon it bastante nga supply it dugo ro provincial blood bank.
Sa makaron hay kapareho man nga pagtinguha ro ginapatigayon it Philippine Red Cross (PRC) Aklan Chapter.
Nauna eon nga ginpahayag it blood bank ag PRC Aklan Chapter nga bangud sa paeag it COVID-19, owa it masyadong naga-donate it dugo ag maabu man nga blood donation ro na-postpone bangud sa community quarantine.
Ro mga successful blood donor hay nakabaton it souvenir nga Dugong Bombo t-shirt ag vitamins halin sa Bombo Radyo Philippines ag Star Fm.
Raya hay mag-eowas pa sa gintau man nga multivitamins with iron it munisipyo , souvenir t-shirt , 10 kilos it bugas , pamahaw , pamasahe ag face shield.
Nasayuran nga ro blood letting campaign it LGU-Numancia hay gintunga nanda sa tatlong cluster agud nga mabantayan it rural health unit ukon RHU Numancia ro hugut nga pagpatuman it health protocols kapareho it pag-disinfect, foot bath , physical distancing ag pagsuksok it face mask.
Sa daywang naunang blood donation drive hay natigayon sanda nga makatipon it 93 nga bags it dugo .
