KALIBO, Aklan — Sa pihak nga may pilang mga nagaduso nga maging republika eon ro Australia, apang mayoriya sa mga residente hay eubus nga nagakasubo sa pagkamatay ni Queen Elizabeth II .
Suno kay Bombo International Correspondent Denmark Suede it Sydney, Australia nga kaabuan sa mga Australians hay nagapabilin nga pro-monarchy.
Ginaboebanta nga kapin sa 15 beses nga nakabisita si Queen Elizabeth sa Australia nga ro pinaka ulihi hay ko 2011.
Si King Charles III sigon ro magiging bag-o nga monarch kasunod it pagkamatay it anang ina.
Raya ro kauna-unahan nga pagbag-o sa head of state it Australia sa masobra sa pitong dekada.
Si Charles ro magiging masunod nga Hari sa idaeum it andang konstitusyon matapos nga ro anang ina hay namatay sa Scotland.
Sangka pormal nga koronasyon sigon ro posibleng matabu sa masunod nga mga inadlaw .
Ro panganay nga unga ni Charles nga si William ro maga-mana it Duke it Cornwall bilang dugang sa anang presenteng titulo nga Duke of Cambridge.
Si King Charles hay nakataeana nga magatau it anang diskurso sa nasyon makaron nga adlaw it Biyernes, kun sa siin raya ro anang magiging unang diskurso matapos magtaliwan ro anang ina.
Sa pihak nga parte, sa Lunes pagadaehon ro eawas it Reyna sa London agud nga igahamyang sa Westminster Abbey , kun sa siin ginaeauman nga ro 14 nga prime minister it commonwealth realms ag iba pang mga lideres it nasyon nga nasakop kato it Britanya hay maga-aeabutan.