Ginpahayag ni Bise Presidente Sara Duterte ro anang pagpati nga si Apollo Quiboloy, ro lider it Kingdom of Jesus Christ, hay uwa eun sa Davao City.
Raya hay sa tunga it padayon nga pag-usoy it Philippine National Police sa pastor sa KOJC compound.
Kat kutan-on kun siin si Quiboloy, ginhangae ni Duterte nga sa eangit imaw.
Si Quiboloy hay sangka maeapit nga spiritual adviser ni dating pangueong Rodrigo Duterte, hay gin-akusahan it sex-trafficking it mga ungang babayi ag kababayinhan nga may edad 12 hasta 25 agud magtrabaho bilang mga personal assistant, o “pastorals”, nga nagahinyo sigon nga makipaghieawas kana.
Ro 74-anyos nga pastor ag limang iba pang nasasakdal hay ginkasuhan it qualified human trafficking ag iba pang mga halimuon nga pagpang-abuso it mga unga.
Ginpamalibaran ni Quiboloy ro mga alegasyon kana, ag ginpahayag nga ginhimo it mga babayi ro alegasyon matapos nana nga pamalibaran ro mga raya.
Ginbutang man it US Federal Bureau of Investigation si Quiboloy sa most wanted list kara para sa pagsabwatan sa sex trafficking sa paagi it puwersa, pandaraya ag pamilit, sex trafficking sa mga unga ag bulk cash smuggling.
Suno kay Duterte, uwa imaw it nakitang bunker o underground facility kat bumisita imaw sa KOJC kato.
Nagapati man si Duterte nga ro pulisya hay nakahimo it pang-abuso sa awtoridad sa pagtao it warrant of arrest kontra kay Quiboloy, apang dugang pa kara hay sangka bagay nga sayuron it korte.
Pahayag ni Duterte nga dapat maging madasig ro pagpatuman it warrant of arrest sa pihak it kabahoe it lugar, kun ikonsidera it PNP hay nag-deploy it mabahoe nga numero it tawuhan.
Nauna nga ginpahayag ni Police Lt. Col. Jerick Filosofo, tagapaghambae it Task Force Teknon Alpha Pro 11, nga ro pagiging kumplikado it compound hay nagadaea it hangkat kanda.
Nagpartisipar man si Duterte sa 39th anniversary celebration it KOJC ku Dominggo it gabei sa sueod it compound.
