KALIBO, Aklan — Nag-umpisa eon ro mga oeobrahon it mga igmanghud nga Muslim sa mga mosque sa probinsiya it aklan bilang kaparte it pag-umpisa it selebrasyon it Ramadan.
Suno kay Sulay Hidjunos, president it Muslim Community sa Numancia nga pila sa mga aktibidad it Muslim sa raya nga tiempo hay ro pag-samba sa mga mosque bilang kaparte it sagrado nga buean it Ramadan.
Ro Ramadan ro pinaka-sagrado nga buean para sa mga Muslim kun sa siin ginapatigayon ro pag-fasting umpisa sa pagbut-eak it adlaw hasta sa pagtunod it adlaw.
Raya sigon ro sagrado nga buean it pagpu-asa, pagpangamuyo, ag pagpamaeandong samtang nagatililipon ro mga tumueu-o sa andang mosque.
Ro fasting sigon nanda hay owa eamang nagalikaw sa pagkaon ag ilimnon kundi kaibahan man ro paglikaw sa mga maeain nga hilimuon agud nga malimpyuhan ro isip ag tagipusuon agud nga mas pa nga mapabakod ro pagtuo.
Ginpahayag ni Hidjunos nga matapos ro Ramadan sa selebrasyon it Eid’l Fitr kun sa siin magasaeo-saeo ro kada pamilyang Muslim, sangka masadyang selebrasyon matapos ro sang buean nga pagpu-asa.
