Kalibo Aklan——-Ginpamilit it Provincial Health Office (PHO-Aklan) nga indi pwedeng gamiton ro rapid antibody test bilang screening test sa coronavirus disease 2019 (COVID-19).
Suno kay Dr. Cornelio Cuatchon Jr. it PHO Aklan nga nauna eon nga ginpaathag it Department of Health nga pwedeng magpaguwa it “false positive” ag “false negative” results ro rapid test.
Sa makaron suno kana hay may pilang mga kompaniya nga gina require ro rapid test sa andang mga empleyado .
Mag-eowas kara , may pilang probinsiya nga raya man ro gina pangayu sa mga naga uli nanda nga mga Locally Stranded Individuals (LSIs).
Gindugang pa kara nga ginarekomenda eamang ro rapid test sa mga ginapatigayon nga research suno sa World Health Organization (WHO).
Samtang, uman nga ginpadumdum ni Cuatchon ro guidelines it DOH ro pagsuksok it face masks, pirmeng pag hugas it alima ukon pag disinfect ag pag obserba it social distancing agud nga malikawan ro makamaeatay nga sakit .
Mas mayad man sigon kon maggamit pa gid it face shield bilang dugang nga proteksyon.
Sa makaron sigon hay may pilang mga establisimento nga gina require ro pagsuksok it face shield .
Raya hay mag-eowas pa sa mandatory nga pagsuksok kara kon nagasakay sa pampublikong transportasyon.
Nag apela man imaw sa publiko nga maging kaparte it solusyon agud nga masuk-ean ro COVID-19 pandemic.
