KALIBO, Aklan — Ginkumpirma ni Malay Mayor Frolibar Bautista nga magakandidato imaw para sa re-election sa eleksyon sa masunod nga dag-on .
Apang indi nana direkta nga masabat kon magapabilin raya sa Tibyog-Akean ukon sa partido ni Aklan 2nd district Congressman Ted Haresco .
Suno kana nga kompleto eon ro andang linyada umpisa sa anang bise alkalde hasta sa anang waeong mga konsehal.
Bangud nga ro isla it Boracay hay ginakabig eon nga nagapanguna nga luxury island’s destination sa bilog nga Asya, pagatutukan it anang administrasyon engkaso nga uman nga swertehon sa anang ulihing termino nga maayos ro iba pang mga pasilidad .
Nakompleto ni Bautista ro anang termino bilang local chief executive kat magdaog sa eleksyon ko 2022.
Madumduman nga ko 2018 hay gin-appoint si Bautista it Department of the Interior and Local Government (DILG) bilang acting mayor matapos nga suspindihon si dating incumbent mayor Ciceron Cawaling bangud sa environmental issues sa Boracay.
Ko Abril 24, 2019 hay ginsibak it Office of the Ombudsman ag DILG si Cawaling pilang domingo antes ro eleksyon .
Maskin nga nagdaog si Cawaling, nagpaguwa it advisory ro DILG Western Visayas ko Hunyo 2019 nga nagamandu kay Bautista nga nagdaog kato bilang vice mayor nga i-take-over ro pwesto bilang alkalde.
