Ginapasumite it Movie and Television Review and Classification Board (MTRCB) Hearing and Adjudication Committee it berepikadong Joint Position Paper sa sueod it pitong adlaw ro respondents sa reklamo angot sa gina-alegar nga racist joke it komedyanteng si Vice Ganda sa segment nga “Memerimar” it noontime show nga It’s Showtime.
Kasunod raya it pagpamati ko Miyerkules, July 29 it MTRCB kaibahan ro mga representative ag legal counsel it TV network kun sa siin ginapaguwa ro nasambit nga programa.
Gintaw-an sigon it MTRCB it kahighayunan nga magpaathag ro mga respondent sa reklamo samtang ginpadumdum man ro mga raya sa mandato it MTRCB sa idaeum it Presidential Decree No. 1986 ag mga Implementing Rules and Regulations it ahensya para masigurong nagasunod sa broadcast standards ro mga programa sa telebisyon.
Mag-eowas sa Joint Position Paper, ginapasumite man ro mga respondent it Joint Undertaking nga nakabutang ro andang mas ginpabaskog mga tikang sa pagsunod sa standards it MTRCB eabi eon sa live, improvised, ag comedy segments.
Dugang pa kara, ginmandu man it ahensya ro pagtaeana it On-Air Compliance Officer nga maga-monitor sa live broadcasts it nasambit nga noontime show para insigida nga mapugngan ro posibleng pageabag sa rules ag regulasyon it MTRCB.
Samtang, ginpahayag man it MTCRB nga nagapabilin nga naka-pending ro nasambit nga reklamo ag paga-resolbahon sigon raya pagkatapos it pag-usisa it komite sa mga ginapangayo nga dokumento ag ebidensya.
