Handum it Aklan Police Provincial Office ukon APPO nga maging madinaeag-on ro andang programang Revitalized Pulis Sa Barangay ukon RPSB sa Barangay Manika sa banwa it Libacao.
Suno kay P/Lt. Col. Bernard Ufano, deputy provincial director for operations it APPO nga napili nanda ro nasambit nga barangay bangud nga dati raya nga ginakabig nga communist-terrorist affected area.
Nauna eon suno kana nga nadeklara ro aklan bilang insurgency free ko Disyembre 2011 , apang uman nga nataeupangdan ro presensiya it mga rebeldeng grupo ko 2018.
Raya ro rason suno kana kon ham-an nga nagpatigayon ro 12th infantry battalion it community support program nga ginsundan makaron it implementasyon it RPSB.
Ginpaathag ni Ufano nga tuyo it proyekto nga mas pang mapaeapit ro kapulisan sa publiko ag mabo-oe ro kahadlok nga andang nabatyagan.
Ro RPSB hay sangka an-um nga buean nga immersion program.
Dugang pa nga bukon eamang it peace and order ro andang pokus kundi nagkaeain-eain nga klase it pagserbisyo.
Pwede man nga magpangayo it assistance sa mga pulis ro sangka indibiduwal nga gusto nga makabo-oe it birth certificate, ayuda ag trabaho.
Ro pulis sigon ro makikipag-angot sa mga ahensiya it gobyerno ag local government units agud nga insigidang mataw-an it katumanan ro andang hinyu.
Gusto man sigon it PNP nga maipatuman ro andang vision nga masiguro ro eowas nga lugar nga maistaran, trabaho, ag negosyo sandig sa Peace and Security Framework it Chief PNP nga ginatawag nga MKKTK ukon Malasakit, Kaayusan at Kapayapaan Tungo sa Kaunlaran.
Nauna kara, ginpangunahan ni P/Col. Victorino E. Romanillos Jr., ro send-off ceremony ag deployment it RPSB Personnel sa Libacao Municipal Police Station sa Brgy. Poblacion sa banwa it Libacao.
Ginkalipay sigon raya it LGU-libacao ag ginakabig nga mabahoe nga bulig sa nasambit nga komunidad.
