Kalibo Aklan ——-Ninahan nga gindaea sa Aklan Provincial Hospital ro sangka motorista matapos nga gin-arado it sangka jeep sa Brgy. Tambak, New Washington.
Ginkilaea ni PSSgt. Alejandro it New Washington PNP ro motorcycle rider nga si Allan Ibuñez Cipriano, sa legal nga edad ag residente it Brgy. Cauayan.
Samtang, ro driver it saeakyan hay ginkilaeang si Johnny Dionesio, 47-anyos ag residente it Brgy. Mataphao sa nasambit nga banwa.
Ginpahayag ni PSSgt. Alejandro nga base sa andang imbestigasyon, nagasunod ro daywang ka behikulo paadto it banwa it New Washington kat gulpi eamang nga nagmenor ro motorsiklo bangud nga may checkpoint sa unahan.
May kaangtanan kara, nakibot eon lang sigon imaw kat gulping gin-arado ro anang likod nga porsyon it jeep nga gintunaan sa anang pagkatumba ag nagresulta man sa anang pag-angkon it lastro sa kaeawasan.
Si Cipriano hay insigida man nga gindaea sa nasambit nga ospital kon sa siin imaw sa makaron naka-confine para sa anang nagakaigong pagbueong.
Samtang, ro aksidente hay padayon pang ginaimbestigahan it New Washington PNP para sa nagakaigong disposisyon.
