KALIBO, Aklan — Nagpanindugan ro municipal transportation task force nga owa it ginapatuman nga political consideration sa nagapadayun nga road clearing operation.
Suno kay Mr. Vic Basia nga hugut nga iga-implementar raya maskin sin-o pa ro madaeasa.
Raya hay kasunod it pag-demolish sa konkretong pader ni Kalibo Sangguniang Bayan (SB) member Daisy Sucro-Briones ag iba pang nagasab-eag sa karsada.
Kaibahan pa sa ginatutukan it task force ro pagputoe sa mga puno it kahoy sa kilid it karsada agud nga makalikaw sa aksidente.
Ginpahayag pa ni Basia nga ro direktiba ni Pangueong Rodrigo Duterte nga bawi-on ro tanan nga pampublikong karsada hay eubus nga makabulig agud nga mapahagan-hagan ro daeagan it trapiko sa bilog nga nasyon.
Samtang, gindugang pa ni Basia nga nalipay man sanda bangud sa ginpakita nga kooperasyon it mga pumueuyu nga nagakahueugan eamang nga naeubtan nanda ro ginapatuman nga layi.
Nasayuran nga nag-umpisa ro countdown ko nagtaliwan nga Hulyo 29, 2019 matapos ro ginpaguwa nga Memorandum Circular 2019-121 it DILG para sa tanan nga mga local chief executives nga ipatuman ro andang gahum agud nga mabawi ro public roads.
