KALIBO, Aklan — Haeos 80 porsiyento eon nga tapos ro konstraksyon it 4.1-kilometrong main road sa isla it Boracay.
Suno kay Department of Public Works and Highways (DPWH)-Aklan district engineer Noel Fuentebella nga ro nasambitang daean halin sa Cagban Port paadto sa Elizalde Property sa Station 1, nga may pondong P490 million hay ginaeaumang matapos sa unang dominggo it Disyembre.
Puro “finishing touches” eon lang sigon ro nabilin sa andang trabaho nga ginakaeakipan it pagsemento sa karsada ag construction it sidewalks.
Natapos eon sigon ro pag-install it mga tubo para sa drainage system sa isla.
Naging mabahoe hangkat suno kana ro tyempo it tag-uean.
Dugang pa kara nga ro masunod nga phase it road rehabilitation hay paga-umpisahan sa unang quarter it masunod nga dag-on kon siin pagatapuson eon man ro circumferential road.
