Kalibo Aklan ——Dead on arrival sa Ibajay District Hospital ro sangka eaeaki matapos nga sumunggab ro ginasakyang kotse bandang alas 6:45 kabi-i sa rotonda it banwa it Nabas.
Nag-angkon it fatal nga lastro sa sueod it anang kaeawasan ro biktimang si Cheron Morales, sa legal ng edad matapos nga maaksidente ro ginasakyang behikulo nga ginamaneho it PSsgt. Elren Ismael, nga nakabase sa Makato Police Station, parehong residente it Purok 4, Laguinbanwa, Ibajay.
Base sa report, nag-adto sa area it Brgy. Caticlan kahapon ro daywa bangud may importante sigon sandang gin-asikaso.
Sa andang pagpauli partikular pag-abot sa pakurbada nga porsyon it nasambitang lugar hay may nakasub-eang sigon sanda nga sangka pick up nga saeakyan nga masyadong mahayag ro head light ag dikara sigon hay nasilawan sa pagmaneho si PSsgt. Ismael.
Aminado man ro nasambitang police officer nga may kadasigon ro anang pagmanaheno rason nga dumiretso ag sumampok sanda sa rotonda.
Bangud sa kabaskog it impact tuga it andang pagka-sunggab hay nawasak ro printi nga porsyon it behikulo.
Insigida man nga binawain it kabuhi si Morales kasunod it insidente samtang nagapabilin man nga naka-confine sa sangka pribadong ospital sa banwa it Kalibo si PSsgt. Ismael matapos rayang mag-angkon it pila ka mga lastro sa eawas.
