KALIBO, Aklan — Sambilog ro naninahan sa banwa it Kalibo matapos ro pagpanaeasa it Bagyong Tino.
Raya ro ginpahayag ni Terrence June Toriano, head it Municipal Disaster Risk Reduction and Management Office (MDRRMO)-Kalibo.
Suno kana nga ro insidente hay natabu sa Brgy. Mobo matapos nga matumbahan it gabok eon nga puno it acacia ro sangka baeay, kun sa siin sangkiri nga naninahan sa anang ueo ro 21 anyos nga daeaga.
Samtang, owa pa sigon sanda it nailista nga mga damages, apang sa andang paglibot, kaabuan sa andang nakita hay mga nagkaeatumba nga mga puno.
Sa makaron hay nagapadayun pa ro andang ginahimo nga Rapid Disaster Assessment and Needs Analysis.
si Terrence June Toriano, head it MDRRMO-Kalibo
Dugang pa ni Toriano nga nagpatigayon it mga preemptive evacuation ro LGU-Kalibo ag mga kabarangayan antes ro pagtama it bagyo partikular sa mga residente nga naga-istar sa open field ag maeapit sa baybayon ag kasubaan samtang ro iba hay boluntaryo nga nag-agto sa mga evacuation centers .
Sa banwa it Kalibo hay nakalista it kapin sa 1,035 nga mga evacuees ro DSWD Region 6 nga temporaryong nag-istar sa nagkaeain-eain nga mga evacuation centers.
Angot kara, gindayaw ni Toriano ro kahauman it mga barangay council eabi eon ro pagpatigayon it clearing operations ag pre-emptive ag forced evacuation.
Ro temprano sigon nga aksyon hay eubus nga nakabulig agud nga mapabilin nga eowas ro mga residente .
