INTERNATIONAL News — Sambilog pang eroplano it Jeju Air nga naghalin sa South Korea ro nagbalik sa ginhalinan nga paeuparan bangud sa parehong isyu sa landing gear nga natukiban sa bag-o eamang natabu nga aksidente nga ginaeakutan it sangka separado nga eroplano it parehong modelo kahapon nga adlaw.
Ro Jeju Air Flight 7C101, nga naghalin sa Gimpo International Airport paagto sa Jeju kaina it 6:37 a.m., hay nakitaan it problema sa landing gear pilang minutos matapos ro pageupad.
Ginpahisayod it airline sa 161 pasahero ro angot sa depektong mekanikal nga nakita sa anang landing gear ag ko ulihi hay nagbalik ro flight sa Gimpo bandang alas 7:25 a.m.
Ginpadayun it Jeju Air ro andang operasyon matapos bayluhan ro eroplano.
Ro landing gear hay sangka importanteng aparato nga direktang may kaangtanan sa kaeowasan it pageupad, kun sa siin ginasigurado ro eowas nga pag-takeoff ag pag-landing samtang ginabawasan ro epekto sa mga emergency landing.
Sa pagbagsak it Jeju Air kahapon it Domingo nga pumatay sa 179 nga kabuhi sa southwestern county it Muan, ginapatihan nga tanan nga tatlong landing gear kara hay owa nag-gana it maayos.
Ro eroplano nga eakot sa panibag-ong insidente hay ro Boeing B737-800, kapareho sa modelo it eroplano nga bumagbag kahapon.
Ro Jeju Air hay may 39 nga makarondaya nga modelo halin sa kabilugan nga 41 nanda nga eroplano it andang fleet.
